Ilang residente sa SJDM, Bulacan, nagawa pang mag-PARLOR GAMES kahit na may ECQ

Mga Larawan mula sa Facebook video ni Kenneth Caballe Rivera T rending ngayon sa social media ang ginawang palaro ng mga pasaway na...

Mga Larawan mula sa Facebook video ni Kenneth Caballe Rivera

Trending ngayon sa social media ang ginawang palaro ng mga pasaway na residente ng Pabahay 2000 sa San Jose Del Monte, Bulacan sa kabila ng ipinatutupad na enhanced community quarantine. Tila nagkaroon ng instant fiesta sa labas ng kani-kanilang mga bahay at may naganap pang pakarera. Kumpol-kumpol ang mga residente sa panonood at hindi na nga  nasunod ang social distancing.

Mga Larawan mula sa Facebook video ni Kenneth Caballe Rivera

Sa in-upload na video ng Facebook page na Balitang SJDM na orihinal na kuha ni Kenneth Caballe Rivera, makikita ang mga lalaking nag-uunahan sa pagtakbo. Tila hindi alintana sa kani-kanilang mukha ang nangyayaring ECQ sa panahon ngayon dahil masasaya silang nanonood ng mga isinagawa nilang mga ‘parlor games’.

Mga Larawan mula sa Facebook video ni Kenneth Caballe Rivera

Ang nasabing video ay agad na nag-viral sa social media at mayroon ng mahigit 90,000 views. Mayroon na rin itong halos dalawang libong reactions na karamihan ay ‘angry’, 1,100 comments at 2000 shares.

Maraming netizens ang nagpaabot ng kanilang pagkadismaya at pagkainis sa mga naturang residente. Mayroon ding nagta-tag ng mga kilalang media organizations upang maiparating ito sa publiko. May mga social media users din ang nag-ulat sa mga kinauukulan tungkol sa nasabing pangyayari.

Hiniling naman ng ilang mga residente rin ng Pabahay 2000 na tutukan raw sana ng lokal na pamahalaan ang nasabing lugar para sa kaligtasan ng mga residente. Panawagan naman nila sa kanilang mga kababayan na sumunod na lamang sa mga ipinapatupad ng kanilang mga lider.

Nanawagan ang mga frontliners at awtoridad na manatili na lamang sa mga bahay kung wala namang mahalagang gagawin o bibilhin sa labas. Hiniling din nilang dapat seryosohin ang umiiral na enhanced community quarantine.

Ayon sa inilabas na ulat ni Mayor Arthur Robes, anim na ang kumpirmadong kaso ng COVID-19 sa lungsod ng San Jose Del Monte. Patuloy pa rin ang pagsasagawa ng disinfecting ng lokal na pamahalaan upang hindi na madagdagan pa ang kaso ng nasabing lungsod.

Ayos lang namang gumawa ng paraan para makalimutan pansamantala ang mga problema, gaya na lamang ng krisis na kinahaharap ngayon ng buong sambayanan. Ngunit, mas mahalagang makinig at sumunod na lang sa mga sinasabi ng awtoridad upang maiwasan ang disgrasya. Mas sasaya ang buhay kung walang iniindang kahit na anumanng karamdaman.

source: news.definitelyfilipino